Una ambiciosa idea del Principáu: Asturies postúlase como sede del Observatoriu del Curtiumetraxe

Asturies postúlase como sede d'una ambiciosa iniciativa de caláu nacional que la convertiría, si espolletara, en puntu neurálxicu de la producción cinematográfica española. La conseyera de Cultura, Política Llingüística y Deporte, Vanessa Gutiérrez, viaxó va unos díes a Madrid p'aconceyar col ministru de Cultura, Ernest Urtasun y poner enriba de la mesa la propuesta pa la creación del Observatoriu del Curtiumetraxe, una ambiciosa idea empobinada a promover la producción de curtiumetraxes d'ámbitu estatal.

El Principáu treslladó al Gobiernu d'España la so voluntá d'entamar esti proyeutu y que s'allugue n'Asturies, lo que sirviría pa dexar claru'l compromisu de la comunidá col sector audiovisual.

El "guion" de la propuesta plantégase como una busca de ferramientes esenciales pal caltenimientu, estudiu y espardimientu del curtiumetraxe. Nesa "trama" diba inxertase a l'alministración central, les comunidaes y les organizaciones profesionales nun texíu de cooperación que s'ampliaría, amás, al ámbitu internacional.

L'Observatoriu llevaría a primer planu'l desenvolvimientu d'una plataforma telemática moderna y eficaz que centralizara l'archivu, catalogación, caltenimientu, analís y espardimientu del curtiumetraxe español. Y entamaría un sistema d'almacenamientu que garantizara la preservación del patrimoniu audiovisual y fixera más cenciellu'l so accesu a programadores y personal investigador. L'Observatoriu tendría una sede física y tecnoloxía avanzada abierta a investigadores y profesionales, ensin escaecer la promoción del curtiumetraxe dientro y fuera d'Asturies, la formación audiovisual y l'espardimientu de conteníos como los curtiumetraxes d'animación, esperimentales o realizaos por muyeres, que davezu queden nun segundu planu.

"Cola ayuda del Gobiernu del Principáu d'Asturies"