Del pupitre a la mina: los escolinos del Licéu visiten el pozu Sotón

Va unos años, igual non tantos como pudiera paecer, el sector del carbón taba enllenu guah.es" que, por nun poder o querer estudiar, acababen trabayando na mina. Va unos díes el pozu Sotón d’Hunosa tamién s’enllenó de neños. Fueron los escolares de 1.u de Primaria del Colexu Licéu Mierense los que llegaron a la esplotación allugada en Samartín del Rei Aurelio pa conocer el trabayu que los sos padres, güelos, familiares o vecinos desempeñaron a lo llargo de la so vida. Vivir nes Cuenques ye sinónimu de conocer a daquién que trabayara na mina, y los más pequeños conocieron los llabores qu’hasta fai apenes unos meses inda se realizaben nel últimu pozu vertical de carbón d’España, el pozu Nicolasa en Mieres.

Llegaben al Sotón los rapacinos acompañaos de los sos tutores Pablo Suárez y María Alonso. De magar se posaben del autobús había nervios. Recibínlos Alejandro Virginio y Yanela Pello, que los diben empobinar na so visita pel esterior del Sotón, y Ana Fueyo, que los acompañaría pel Centru d’Esperiencies y Memoria de la Minería (CEMM). A lo llargo de la mañana hubo dos relevos. Nel primeru, la metá del grupu foi conocer la mina de L’Entregu, mentanto que’l restu diría a la zona museística. A mediudía, y en comiendo un aperitivu pa reponer fuerces, camudaríen el turnu.

Tanto nún como n’otru sitiu, los neños gazáronlo bien d’ello. Pa poder ver la parte más industrial del enclave, los neños teníen que poner cascu y guantes (amás d’un chalecu). Llegaben les primeres dificultaes. Porque visitise pa "baxar" a la mina nun ye fácil. Pero too se supera. Y después de dalgún qu’otru axuste de cascos y guantes, y dalguna engarradiella pa que’l chalecu tamañu adultu s’axustara nel cuerpu de neños y neñes de 6 años, los rapacinos llegaron a la boca del pozu. Ellí l’asordecedor "turullu", con un soníu que dellos de los neños identificaron perfectamente, dába-yos la bienvenida al tayu. Alejandro Virginio y Yanela Pello esplicábenlos lo que yeren los castilletes, qu’el sotón tenía "p’baxo" la mesma fondura que l’edificiu más altu del mundu, o llevábenlos a una xaula de muestra pa que tuvieren la esperiencia de montar nel "ascensor" que lleva a los mineros al trabayu. "Pero esto nun se mueve", comentaba ún de los rapacinos al salir con inocencia.

FOTOGALERÍA: Asina foi la visita de los escolinos del Licéu Mierense al pozu Sotón

Ver galería

Los mini-mineros siguíen cola so esperiencia pel pozu probando la sensación d’andar per una "rampla" o conociendo como se "postiaba" p’asegurar el terrén nel que teníen que trabayar. Onde munchos pegaron un blincu foi cuando escucharon un "barrenazu" nun trozu de galería. "Vaya sustu", comentaben los neños unos con otros.

Muséu

Mientres unos esperimentaben a la lluz del sol, l’otru relevu del Licéu Mierense conocía les coraes del CEMM, que nun ye un muséu al usu, sinón que permite a los sos visitantes interactuar con delles de les partes de la mina que s’enseñen. De mano, los rapacinos pegaron un blincu al entrar cuando vieron al fondu a la mula que d’antiguo s’utilizaba pa cargar el carbón. "Ta endemoniada", facía ún de los neños, ante la risa nerviosa del restu. Escucharon a Ana Fueyo esplica-yos qué ye’l carbón o como a Asturies vieno muncha xente d’otres provincies y países a trabayar a les mines cuando’l sector taba a plenu rendimientu.

Los rapacinos escuchaben atentos y formales, daqué nada fácil pa una ventena de "seisañeros" inquietos. Pero la recompensa llegaría-yos más bien llueu que tarde. En pareyes pudieron esperimentar lo que yera emburriar una vagoneta de cerca una tonelada peles víes. Y anque a dalgunos se-yos atrullaba, Ana Fueyo enséño-yos una de les máximes de la mina: que los compañeros tán p’ayudase. Asina que los que se trababen cola vagoneta, namás teníen que glayar "compañeru, dame tira", y los sos collacios de clas allegaben a echar un gabitu. Porque anque les mines de carbón seyan yá historia nes Cuenques, l’espíritu de solidaridá y compañerismu sigue presente.

Tamién pudieron vivir los neños la sensación de caminar a escures pela mina, garraos a una cuerda. Una percorríu que quixeron facer más d’una vegada. Conocieron lo que yera un hospitalillo, y tamién dieron un paséu per un economatu antiguu. Les guíes del CEMM esplicaron tamién a los rapacinos que va delles décades, igual non tantes, había neños y muyeres que trabayaben na mina, pero que nun teníen los mesmos derechos que los homes. "Ye inxusto que trabayaren más hores y cobraren menos", apuntaba dalguna qu’otra neña, con más razón qu’un santu.

P’acabar la visita, toos llevaron pa en casa un cachu pequeñu de les coraes de la tierra, unes piedres pequeñes de carbón que los guíes d’Hunosa-yos apurríen, y que van guardar como oru en pañu. Porque esti regalu va ser parte de l’alcordanza d’una esperiencia que-yos permitió conocer la hestoria de los valles mineros. Y porque, amás, nun foi un presente envenenáu. Porque yá se sabe que’l carbón, como-yos dixo Alejandro Virginio a los rapacinos, sirve pa trés coses: pa xenerar calor, pa xenerar enerxía, y pa que los Reis Magos repartan en Navidá a los neños más trastes. Si se porten como na visita, los de Licéu nun cuerren peligru nengún.