Infidelidad emocional

–No, nun lo niego.

–Ah, lo reconoces.

–Pos sí, Trini, tengo un crush.

–¿Un qué, ho?

–Un rollu imposible, platónicu.

–¿Ves? Yes infiel.

–¡Calla, ho! Tener un crush nun ye una infidelidá.

–¿Quién lo dijo?

–Nunca va pasar nada.

–¿Y si pasa?

–A ver, Trini, que tamos en Sama y esta rapaza vive en Manhattan.

–¿Y por qué tienes que tar pendiente de la Gran Manzana si equí tenemos pumarada?

–Les redes, Trini, el caldu...

–¿Qué caldu?

–El caldu de cultivu, vida. Les redes sociales impúlsennos a fantasiar con otros.

–Yes un salíu.

–¿Salíu de qué? Si solo faigo que ver fotos, pone-y likes…

–Yá. Y sientes mariposes nel estómagu cuando mires Instagram.

–¿Pero qué culpa tengo yo?

–Infidelidá emocional.

–Yo contigo toi feliz.

–Yá. Pero en tu cabeza hai alguien más.

–Son fantasíes, amores imposibles…

–¿Tuvisti con ella o no?

–No. Bueno, sí. En mi imaginación...

–¿Ves? Sabíalo yo. Cabrón.

–¿Qué ye, ho?

–Yes un gochu, Miguel Ángel. Ye tan triste que te guste alguien de fuera…

–¡Trini! ¿Y esa xenofobia?

–De fuera de la pareja, gilipollas.

–Sin faltar, eh.

–Ye que toi farta, pónesme negra.

–¿Pero ónde ta’l problema? ¡Nun hai contactu físicu! Nin un acercamientu.

–¡Ja! Porque ella ta en Manhattan y tien pareja.

–Y yo.

–¿Tú qué?

–Que toi casáu contigo. Pero, vida, nun podemos controlar los pensamientos y les emociones.

–Voi garrar esi teléfonu y voi metételu pol culo.

–¿Agora, n’ayunes?

–Yes un inmaduru, Miguel Ángel.

–A ver, ho. L’amor platónicu llámase así por algo.

–Sí, porque quies llevalo al platu. Y mires Instagram pensando al platu vendrás.

–Home, Trini, si vien mañana Brad Pitt…

–¿A Sama? ¿Va venir?

–¿Ves? Yá te punxisti cachonda solo de pensalo.

–¡Nun tamos hablando de mí!

–¿Ves? Siempre igual. Hablamos de lo qu’a ti te da la gana.

–Pero vamos ver, ¿quién empezó?

–Eso digo yo: ¿quién abrió esti melón? n

www.maxirodriguez.net