Dos poetes de tiempu y con acentu

Raúl Alonso (Xixón, 1999) ganó’l Premio Asturias Joven de Poesía 2003, dau pola Dirección Xeneral de Mocedá del Principáu, col llibru "Tiempu de nós", (Trabe, Uviéu, 2024). Dos testos sofitu acompanguen perbien el conteníu de los poemes: "Un tiempu que nos pertenez", de Francisco Álvarez y un "Epílogu" de Vera Cordeiro. Tocóme asistir a una de les presentaciones, na Llibrería Matadero. Pude ver a Raúl arrodiáu de l’amistá d’almiradores, dalgún alumnu míu ente ellos, y noté en direuto’l mensaxe qu’ellí resurdía: ye’l tiempu nuestru, sumáu al tiempu de la comunidá pero nuestru d’equí, de la nuestra edá y de les nuestres experiencies. Contestamos a la entruga fonda a la que contestaren otres edades y persones. Quiénes somos, qué vemos, qué sentimos y qué acentos ponemos a la nuestra tierra, a la nuestra vida. Si me viera obligáu al tópicu de les xeneraciones diría que toi lleendo la voz y el glayíu de la cuarta xeneración del asturianismu qu’entamó Conceyu Bable. Hai que dicilo: primero d’agora estes coses nun pasaben. Habría asturianistes pero nun había masa crítica que ficiera grupu granible y reconocíu. Por contra estos son dalgunos versos de "Tiempu de nós". Empiece del primer poema, "Cuantayá", páxina 15: "migayes de grisú y praos abarganaos / asina ye esta cadarma / que s’estiende / per esta tierra empodrecío". Pieslle del poema caberu, "This is the last time", páxina 56: "como dicía aquel cantar, / nun quiero coyer la flor. / yo quiero quiero dexala medrar". Y yá ñidio y direuto, final de "Somos parte de la hestoria", páxines 43-44: "raigaños muertos / y enfermedá nos pulmones / qu’entemecen una tierra / que paez una isla / y que namás ye / un escaezu que percuerre / les carreteres / formando l’anatomía d’un bache / que ye un abismu. / mientres tanto, lo único que nos salva de desapaecer / ye’l puxu pola nuesa llingua".

Miliu Ureta (Ribeseya,1970) ganó’l Premiu "Teodoro Cuesta" 2023 col llibru "L’acentu {de per embaxu} de les velux grandes" (Trabe, Uviéu, 2024). Ye notable que Miliu tenga ganao esi premiu tamién en 2021 y que seya graduáu n’Humanidaes pola Universitat Oberta de Catalunya. Dígolo porque Teodoro Cuesta mesmu, el personaxe del sieglu XIX, foi ensin dubia una especie de asturianista dedicáu a la música, a la poesía y al folklore.Como aquelles décades pidíen nun dexó de ser amigu de los burgueses antibablistes d’entós, póngase Alejandro Pidal y Mon. Ehí ta’l impresionante monumentu del mui popular Teodoro, en Mieres. Los "bablistes" estandar de güei tienen otru xeitu: son estudiosos, tan viaxaos, nun tienen estatues (de momentu) pero enganchen social y estéticamente cola modernidá más comprometida. Vamos mirar el títulu premiáu de Miliu Ureta. ¿Ye raru? Namás abrir el poemariu descúbrese que nun ye herméticu sinon que trabaya un estilu de tradición vanguardista. ¿Qué hai que facer? Seguir el tiempu de madurez d’un yo torcigañáu y explosivu que tien nel términu "acentu" la clave de la sospresa. El poeta tien un procuru básicu de poesía plástica y usa guapamente munches formes d’asturianu oriental. Unes veces hai xoyes, como "{maria}", páxina 35: "y como é que nun acentúes Maria / dixéran-y / porque asina me llamo / dixo ella / y esa soi / h.iya de Mario". Otres son camientos metafísicos o hestories d’alcuentros. Y arriendes d’eso, a la fin, coses d’amor. Como en "(in) móvil", páxina 69, "yo nun voi tar / nun voi tar/ nel cuerpu xinasta col que m’allories/ cada vegada que me dexes vete".

Suscríbete para seguir leyendo