Asturies relluma na industria solar cola gran fábrica qu'entama Sunwafe en Xixón

Asturies nun ye precisamente la comunidá más soleyera d'España y, por tanto, en comparanza con otros territorios nun destaca nel esplegue de parques d'enerxía solar fotovoltaica. Pero sí ta rellumando cada vez más na industria que fabrica y distribúi los paneles, esenciales pa la transición enerxética. La comundá asturiana puede pegar un blincu xigantescu nesti ámbitu gracies al descomanáu proyeutu sopelexáu'l por LA NUEVA ESPAÑA: el de la compañía Sunwafe pa instalar en Xixón una gran fábrica d'oblees de siliciu, básiques na composición de les plaques solares. 

Les cifres que presenta'l plan son apolmonantes pa un territoriu como'l del Principáu. Sunwafe consiguió una ayuda de 200 millones d'euros de fondos europeos, la mayor concedida a una empresa de la comunidá dende los 450 millones otorgaos va dos años a ArcelorMittal pa descarbonizar los altos fornos de Xixón (finalmente non utilizaos). La inversión total prevista pol fabricante d'oblees –que tien el sofitu financieru de China y que ta venceyáu a InnoEnergy, una sociedá d'inversión n'enerxíes verdes sofitada pola UE– ye de 670 millones. La factoría cuenta con ocupar más de 100.000 metros cuadraos na Zona d'Actividá Loxística d'Asturies (Zalia) y emplegar a 2.600 persones.

Estos volumes sollertaron grandes esperances, magar el proyeutu entá ta dando los sos primeros pasos. Pero nel sector consideren que podría suponer un emburrión a les fábriques asturianes dedicaes a les estructures metáliques de los paneles solares. "La implantación de factoríes ye lo que puede facer d'Asturies un fechu diferencial", afirma l'avilesín Javier Fernández-Font, vicepresidente de la Unión Española Fotovoltaica (Unef) y direutor xeneral d'Alusín Solar, especializada nes mentaes estructures. "Lo ideal ye que Sunwafe se convierta nel futuru nel proveedor del restu de fábriques de la comunidá, una y bones les oblees de siliciu son el productu más caru de la cadena de producción. D'esa manera, amás de xenerar un efectu tractor nel restu del texíu empresarial dedicáu a equipos d'enerxía solar, garantizaría qu'el 80% de los componentes de los paneles tean fechos non yá n'España, sinón concretamente n'Asturies", esplica Fernández-Font.

Aceru especializáu

N'efectu, otres compañíes con presencia nel Principáu son cruciales na ellaboración de paneles, como Gonvarri Solar, Asturmadi Reneergy, Sotysolar o la mesma Alusín Solar. Coles mesmes, la siderúrxica ArcelorMittal fabrica n'Avilés acero especial "magnelis", un productu con un recubrimientu metálicu qu'ameyora la resistencia del aceru a la corrosión, lo que lu fai mui amañosu pa la fabricación d'eses estructures. 

Exiom, acomuñada a Iberdrola, anunció l'entamu d'una fábrica de paneles solares nes antigües instalaciones de la multinacional británica Vesuvius en Llangréu. Según s'espublizó fai más d'un añu, el proyeutu cuenta crear 115 empleos. El distribuidor de los paneles d'Exiom ye la compañía uvieína Bexie Group, que va instalar una nave en Bobes (Siero) con cerca d'un centenar de trabayadores, y que negocia col Gobiernu asturianu la implantación de fábriques na comunidá. 

Amás, Asturies tien inxenieríes destacaes nel diseñu de parques solares. A pesar de que delles traviesen anguaño por problemes, esisten firmes como Imasa que nos últimos años desenvolvieron delles plantes solares.

"Cola ayuda del Gobiernu del Principáu d'Asturies"