El Certame "Mánfer de la Llera" premia los meyores relatos n'asturianu con hasta 1.600 euros

La Sociedá Cultural La Montera entama'l III Certame Internacional de Cuentos Curtios "Mánfer de la Llera", un concursu lliterariu abiertu a toles persones interesaes en compartir el so talentu na escritura d'obres n'asturianu, con premios que xuben hasta los 1.600 euros.

El certame tien dos modalidaes: asturianu y castellán, con categoríes pa mayores y menores d'edá y los participantes van poder presentar relatos inéditos n'asturianu que nun fueren premiaos n'otros certames, respetando un formatu de lletra Times News Roman, tamañu de fonte 12, a doble espaciu y marxes estándar.

La recepción d'obres orixinales yá ta abierta, y remata'l 2 de mayu. Hasta entós, puen unviase los relatos en formatu dixital o físicu.

Premios a obres lliteraries asturianes

El premiu pa obres n'asturianu xube a 1.600 euros pa mayores d'edá y a 400 pa los menores, y les obres en castellán puen optar a un premiu de 800 euros pa mayores d'edá y 200 euros pa menores.

El xuráu, compuestu por espertos de la lliteratura y la cultura asturianes, va poder declarar desiertos los premios si considera que les obres presentaes nun axunten méritos abondo pa llevar un galardón.

Amás, les obres premiaes van quedar en poder de la Sociedá Cultural La Montera, que va poder publicales y editales nuna futura escoyeta.

Cada relatu, que va poder tener una estensión d'ente dos y diez páxines, va presentase baxo un pseudónimu, garantizando l'anonimatu del autor o autora hasta'l la resolución del certame.

Los galardonaos van ser anunciaos a finales d'agostu y la entrega de premios ta programada pa setiembre.

"Cola ayuda del Gobiernu del Principáu d'Asturies"