Mundo contra el mundo

–Valió, Mundín. ¡Paeces un gatu n'una perrera!

–Gonmimacho…

–¡Coime, tol día rabiando! Que si les terraces, que si los ruios, que si los precios, que si tán toos contra tí, que si cambien a Josín por Davicín...

–Dubassin.

–Qué más da. El casu ye protestar, siempre lo ves tou mal.

–Puto verano…

–Si llueve porque llueve, si fai calor…

–¡Mira esi oveya…!

–Relájate un pocu, ho. Que tas más tensu que Harry “el sucio” sin cerilles.

–Lo que toi ye decepcionáu.

–¿Por?

–Amar ye ingrato, comer engorda, beber sal caro, puto verano.

–Tranqui, Mundín.

–¡Vamos pa casa, Adelaida!

–Pero si acabamos de salir…

–Mira qué xareu, paez que lo regalen, qué cantidá de boborolos…

–¿Pero por qué te molesta la xente?

–¡Tán sin cepillar! ¿Nun los ves? Ocupando tou, dando voces, nun saben ónde anden…

–Eso ye turismofobia, Mundu.

–Seralo guapamente.

–Tas llenu de fobias, Mundín: turismofobia, termofobia, talasofobia…

–Fotofobia.

–Ah. ¿Tamién tienes intolerancia a la lluz?

–Non. A estos carapijos que se paran en mediu a sacase fotos. ¿Paezte normal?

–Si quies, garramos el coche y…

–¿El coche pa qué? ¡Si nun hai onde aparcar!

–¿Ves? Yá tamos. ¡El pensamientu catastróficu!

–¿Qué, ho?

–Que siempre pienses lo peor. ¡Inhala, Mundo!

–¿Eh?

–Que respires profundamente. Hai que mirar esi gatillo.

–¿El qué, ho?

–El gatillo emocional. Tienes algún trauma col verano. ¿Te perdisti y te anunciaron por megafonía? ¿Lleváronte a la fuerza de campamento?

–¿Que qué, ho?

–¿Ficiéronte la cobra en "El Oasis"? ¿Algún trauma de merenderu?

–¿Qué pijaes dices, Adelaida?

–Reacciones asina, Mundín, porque tienes heridas.

–Sí. La verdá ye que me mancan les sandalies.

–Nun me refiero a eso. Seguro que dientro de ti tienes miedos, inseguridaes. Vas tener que facer un trabayu personal.

–Sí, ho. La cuenta. Poneme agora a trabayar.

–Nun puedes echar siempre la culpa a los demás.

–¿Por?

–Porque la fuente del malestar ta en ti.

–¿Qué fuente ni qué mi madre? ¡Mira qué xareu, paez que lo regalen!