Uxo, solidaridá dende’l pupitre

Si hai una carauterística común en toles cuenques mineres, esa ye la solidaridá. Ayudar al próximu forma parte del ADN de la familia minera, de los vecinos y vecines d’estos conceyos. Y ye daqué que se mama dende’l trubiecu y apriéndese dende la escuela. Tal que faen nel colexu públicu Santa Eulalia d’Uxo, que los sos alumnos, padres y profesores enfótense n’echar un gabitu a la comunidá.

L’amuesa postrera d’esti altruismu foi la carrera entamada pol colexu pa recaudar fondos na llucha contra la leucemia infantil. Un dineru que va recibir la Fundación "Unoentrecienmil", qu’engarria contra esta enfermedá nos neños. Esplica René Benito, direutor del Santa Eulalia, qu’esta carrera solidaria aporta en 2024 a la so cuarta edición. "Remaneció too va unos cuatro años, ente otres coses, porque ún de los valores que queremos treslladar a la educación de los guah.es ye l’espíritu solidariu y d’ayuda a los que más falta-yos fae", diz el docente.

Asina, camentaron entamar un eventu solidariu pa recaudar fondos, y surdió la posibilidá d’axuntase a la carrera qu’entama la fundación contra la leucemia infantil. "Lo que facemos ye vender unos dorsales en cuenta d’un donativu que nos apurren les families, que pueden tener ún o dellos dorsales, y lo qu’entamamos ye una carrera pa dar visibilidá", esplica’l direutor del centru ustianu.

Nun quieren qu’esa solidaridá quede namás intramuros del Santa Eulalia. Ello ye que la carrera entámenla pel pueblu, pa que los vecinos puedan vela y da-y también un emburrión a la causa. "Uxo collabora con toles causes benéfiques y solidaries que facemos nesti colexu, que son más d’una", sentencia’l direutor. Como amuesa, más allá de l’aportación económica, ta que delles fruteríes y negocios hosteleros de la localidá donaron la fruta y l’agua pal abastu de los neños.

Porque na carrera solidaria participa tol colexu, dende los neños d’Infantil de 3 años hasta los de 6.u de Primaria que yá tienen un pie nel institutu. "Los neños tán encantaos, ponémos-yos un percorríu distintu acordies a la so edá y pasen una mañana mui prestosa al tiempu que solidaria", fae Enrique Benito. Nun fai falta que lo xure: ver les cares de los pequeños caleciendo enantes de correr, o animándose unos a otros mientres tán en metá de la preba ye bona amuesa del gran ambiente que se vive.

Y los padres, güelos y demás familiares, más de lo mesmo. Alredor del polideportivu d’Uxo, asitiábense estratéxico nes ceres p’animar a los rapazos y afalalos nesi percorríu solidariu.

Mercadín

Nun foi la d’esti miércoles la única aición solidaria del colexu Santa Eulalia d’Uxo. El cursu pasáu, los alumnos entamaron per primer vegada un mercadín solidariu con productos fechos por ellos mesmos. "En cuenta de facer una función de Navidá, decidió apostase por un mercadín solidariu", indica Benito, qu’afirma: "Lo que pensamos ye que’l verdaderu espíritu navidiegu ye la solidaridá y l’ayudar al que más falta-y fae, y tamién quiximos treslladar eso al alumnáu". Foi un éxitu dafechu, con una recaudación de más de 500 euros que s’apurrieron al comedor social de Mieres (Amicos).