Esi ye’l titulu del llibru publicáu pol historiador Carlos Gordon (Trabe) que trata de les circunstancies qu’arrodiaron al proyeutu d’Estatutu d’Autonomía d’Asturies durante la II República española. Lo más notable d’él ye qu’acabó por nun presentase y qu’enxamás pareció textu siquier incompletu de proyeutu talu. Les consecuencies d’esa falta siguen cargando sobro les faltes del Estatutu actual, noventa años dempués. Pero les desplicaciones minucioses de Carlos Gordon convéncenos de que en verdá yera casique imposible que pasara lo que pasó, lo que llévame a mín a sorrayar que’l dudosu mitu de l’Asturies a la que nunca naide venció falla nesti casu: foi derrota lo de nun presentar l’estatutu al mesmu tiempu que los "galeuscas", Galicia, Euskadi y Catalunya. Agora bien, el llibru qu’estudiamos nun ye una crónica resumida d’aconteceres y casualidaes sinon un estudiu que garra’l tema dende décades atrás, sigún el rigurosu métodu de consultar lo que paez ser la totalidá de la prensa del momentu, pongamos los años venti y trenta del sieglu pasáu, na medía en que se refier a persones, idees, guerres y paces, y sobre too a partíos políticos o similares acordies col tema y conceutu que-y paez a Gordon más decisivu, esto ye, la llucha de clases. Doime cuenta de que al anunciase’l llanzamientu d’esta obra la gayola por conocer por fin lo que pasó col estatutu perdíu yera grande. Y yelo tovía pero non polo que podía imaxinase de rellaciones y comentarios de les persones que la Diputación d’entós nomó, 1931, como ponentes y encargaes de facer el dichosu estatutu. Resulta que la prensa malpenes faló de tal cosa, y qu’elles polo visto nin se vieron ni se reunieron. Si nun surden más noticies ye que nun tuvieron tiempu o interés bastante, o dambes. Eso sí, sábese lo que pensaba ca una d’elles del posible estatutu, pero nun llegaron a discutilo. Dao lo siniestro d’aquella década igual se m’escapa daqué d’humor negro nesti comentariu. Pero eso sí: el llibru de Carlos Gordon tien 572 páxines, ta escritu n’asturianu y estudiándolu repasa ún a fondo muncho de la hestoria moderna político-social del nuestru pequeñu y verde país. De toes maneres convién poner equí los nomes de les personalidaes que formaron l’equipu que debía presentar el anteproyeutu d’estatutu autonómicu al Parlamentu español, porque dame que la mayoría llectora de periódicos igual nun los vió nunca xuntos: D. Ramón Menéndez Pidal, D. Ramón Pérez de Ayala, D. Manuel Rico Avello, D. Teodomiro Menéndez y D. José A. Buylla. Si como lleo en Gordon resulta que foi Manuel Rico Avello el más interesáu y aplicáu na xera nun ta de más soliñar que foi un políticu que viniendo de la Agrupación al Servicio de la República tuvo les más altes responsabilidaes, y non solo ministerios, nos gobiernos de Diego Martínez Barrio y de Alejandro Lerroux. Y que deteníu en Madrid dempués del 18 xuneto de 1936 foi asesináu nes matances del 23 d’agostu na Carcel Modelo. Más pallá de les ilusiones –nos dos sentíos– sobro estatutos, autonomíes y reformes d’España, tábamos metíes na guerra civil, lo peor y más feo. Pa finar, lo que Carlos Gordon pon na páxina 566 del so llibru: "A la fin y a la postre, sacante excepciones individuales, los partíos teníen otres prioridaes na axenda y en ningún momentu trabayaron seriamente p’algamar el tipu de consensu que precisaba llevar a les Cortes un anteproyectu, y después, lluchar pa la so aprobación. N’Asturies de los años trenta, cualquier tema que nun s’axustara al marcu izquierda-derecha o burguesía-proletariáu teníalo mui complicao pa poder articulase social y políticamente".