Estos son los trés conceyos d'Asturies onde más xube'l preciu de los pisos y estes son les razones

Castrillón, Avilés y Corvera, per esti orde, lideren el ranking de conceyos asturianos tocantes a mayores incrementos de precios de la vivienda nel primer trimestre d'esti añu, dende xineru al marzu recién rematáu. Nel últimu informe de Fotocasa analízase, en concretu, la medría trimestral de los precios en dieciséis conceyos, ente los que tán los yá citaos de la comarca, como tamién Mieres, Xixón, Uviéu, Ayer, Llanes, Grau o Llangréu. En diez de los 16 prodúcense incrementos nel preciu de la vivienda por metru cuadráu. Desinflen, otra manera, Valdés, Samartín del Rei Aurelio, Llaviana, L.lena, Pravia y Siero, con un descensu, nesti últimu conceyu, del 8 por cientu al respeutive del últimu trimestre de 2024 nel preciu del metru cuadráu de les viviendes en venta. A nivel asturianu'l preciu de la vivienda sufrió estos meses la mayor xuba trimestral ya interañal de los postreros 18 años y el metru cuadráu algamó los 1.880 euros en marzu.

Na comarca incrementáronse, d'esti xeitu, los precios del metru cuadráu: en Castrillón un 10,5 por cientu y n'Avilés un 10,4 por cientu. Nel casu de Corvera l'aumentu trimestral ye d'un 9,5 por cientu. Nel casu de Castrillón el preciu del metru cuadráu en marzu cerró percima de los 2.000 euros (2.123 en concretu). N'Avilés asitió en 1.710 euros, y en Corvera, en 1.248 euros por metru cuadráu.

"El preciu de la vivienda encarezse a un ritmu mui significativu tanto trimestralmente como interanualmente. El mercáu de la vivienda alcuéntrase nun puntu de cambiu nel que la ufierta y la demanda nunca tuvieren tan alloñaes. La demanda vive un puxu grande por mor de factores como'l crecimientu demográficu deriváu de los fluxos migratorios, l'aumentu de llares unipersonales, les condiciones hipotecaries más curioses y les nueves ayudes alministratives", esplica María Matos, direutora d'Estudios y vocera de Fotocasa. Amiesta, tocantes a la ufierta: "Nun sigue'l ritmu, una y bones la industria inmobiliaria enfrenta dificultaes p'aumentar la producción y l'ampliación del parque públicu crez a pasu lentu por demás". Esti "desaxuste", insiste, "xeneró una tensión nos precios especialmente nes ciudaes con mayor atraición poblacional, zones turístiques y conceyos que llinden coles grandes urbes, onde los incrementos caltiénense a un ritmu esmolecedor yá dende l'añu 2022".

N'Avilés propúnxose, no que fai a esto, la declaración de zones tensiones de los siguientes barrios: El Quirinal (la zona de Valgranda), el centru urbanu, Sabugo, Les Meanes, El Carbayéu y La Madalena. La Conseyería d'Ordenación del Territoriu, Urbanismu, Vivienda y Derechos Ciudadanos alvirtió yá'l febreru pasáu que les localidaes de Les Vegues (Corvera), Lluanco (Gozón) y Salinas (Castrillón) cumplíen de la mesma con dalgún de los criterios pa poder ser consideraes como zones tensionaes. Nos trés casos, la tensión de los precios débese al costu de la vivienda n'arriendu.

Los informes ellaboraos pola Conseyería identificaron que'l costu d'arrendar una casa nestes localidaes en relación colos ingresos de los llares supera'l 30%, lo que significa qu'una parte relevante de los ingresos de los residentes destínense al pagu de la renta. Esi porcentaxe xustifica por él mesmu que la zona pueda ser declarada como tensionada. Los estudios realizáronse per aciu de la prospección del mercáu y la comparanza de datos de delles fontes, tanto públiques como privaes.

"Cola ayuda del Gobiernu del Principáu d'Asturies"